Google+ սոցցանցում առկա ֆունկցիան, որը թույլ է տալիս անմիջապես սոցցանցում բացված պատուհանում դիտել այլ կայքերը, կարող է օգտագործվել հաքերների կողմից՝ ցանկացած կայքի վրա հարձակում կազմակերպելու համար: Այս մասին հաղորդել է IHTeam ընկերության տեղեկատվական անվտանգության մասնագետների խումբը: Նրանց խոսքով՝ հայտնաբերված եղանակը թույլ է տալիս ոչ միայն բազմաթիվ հարցումներ ուղարկել կոնկրետ կայքին, այլև այդ ամենն անել «թաքնված» և առանց հետքեր թողնելու:
«РИА Новости»-ն գրում է, որ «Կասպերսկու լաբորատորիայի» ռուսական գրասենյակի ներկայացուցիչները փորձարկել են այս եղանակն ու հաստատել դրա աշխատունակությունը:
Էջերի նախադիտման ֆունկցիան աշխատում է հետևյալ կերպ. օգտագործողը որևէ էջ դիտելու համար հարցում է ուղարկում Google-ի սերվերներին, որոնք իրենց հերթին կրկնում են հարցումը և ցուցադրում կայքը: Արդյունքում կայքը դիտելու հարցումն ուղարկվում է իրականում ընկերության սերվերի կողմից:
Հայտնաբերված եղանակը ցուցադրելու նպատակով IHTeam-ի մասնագետները մշակել են մի ծրագիր, որը կարողանում է շատ կարճ ժամանակում կատարել հազարավոր նման հարցումներ: Հիշեցնենք, որ DDoS հարձակում իրականացվում է այն ժամանակ, երբ կայքի սերվերին ուղարկվում են բազմաթիվ հարցումներ` ծանրաբեռնելով այն:
Սոցցանցի այս խոցելիությունը հայտնաբերվել է օգոստոսի 10-ին: Նույն օրը IHTeam-ը տեղեկացրել է այս մասին Google ընկերությանը, սակայն առայժմ ոչ մի արձագանք չի ստացվել:
|
